Grunna redusert brannfare i terrenget etter mykje nedbør i Bjørnafjorden det siste døgnet, blei det ekstraordinære forbodet mot bruk av eld utandørs oppheva klokka 12 i dag.
– Det betyr at frå tysdag 27. juni klokka 12 er det igjen lov å tenna eld og grilla på kommunen sine tilrettelagde bål- og grillplassar, i offentleg tilgjengelege parkar og friluftsområde og på tilrettelagde badeplassar, der ikkje andre reglar gjeld, seier brannsjef Espen Storum i ei pressemelding.
Det ekstraordinære forbodet tredde i kraft laurdag 16. juni, og blei ståande gjennom blant anna sankthansaftan.
– Vi vil minna alle innbyggarane på at det generelle bålforbodet gjeld framleis.
Dette betyr at det er forbode å tenna eld i eller nær skog og anna utmark i perioden frå 15. april til 15. september.
– Vi oppmodar alle til å vera merksame og ta naudsynte førebyggjande tiltak for å unngå brannar.
Brannvesenet vil samtidig takka alle innbyggarane for at dei har vist forståing og vore varsame i den ekstra tørre perioden.
– Dykkar bidrag har vore avgjerande for å redusera risikoen for brann og for å sikra tryggleiken til lokalsamfunnet vårt, avsluttar Storum.
