Tre kommunar saman om gaming i haustferien
Heime, men ikkje åleine: Inviterer til konkurranse i Fortnite og Minecraft.
Allgames 2021 er eit samarbeid mellom Bjørnafjorden, Bergen og Øygarden kommunar, ein del av «Aldri åleine»-prosjektet.
Arrangementet er eit heildigitalt gamingevent kor deltakarane konkurrerer i Fortnite og Minecraft.
Tysdag 12. oktober er det kvalifiseringsrunde, i romjula, tysdag 28. desember, er det finale.
Påmelding er på aldri-alene.no. I kvalifiseringsrunden kjempar deltakarane om premiar frå blant anna Power Lagunen, Høyt & Lavt og TV2 Play.
– Gaming og andre digitale aktivitetar spelar ei stor og viktig rolle i livet til barna og ungdomane våre. Vi foreldre tenker gjerne på gaming som ein usosial og einsam aktivitet, når sanninga er at dette er ein superinkluderande, sosial arena som vi vaksne ikkje heilt forstår, seier Carl-André Dahl i Bjørnafjorden kommune.
Arrangementet er ein del av «Aldri åleine»-prosjektet, eit samarbeid mellom Bjørnafjorden, Bergen og Øygarden kommunar. «Aldri åleine» har fokus på inkludering, samhald og det å vera openom psykisk helse.
– Gaming bryt ned ulikskapar og bygger fellesskap på tvers av kjønn, alder, etnisitet og funksjonsevne.
Kommunen har også, med støtta frå Staten og restar frå sommarferieskulane, eigen haustferieskule med åtte kurs dei neste dagane.
