Væpna aksjon: Mannen er no ute av huset

Oppdatert kl 11.23: Politiet opplyser no, ifølgje BT, at mannen har kome ut av huset. Det skjedde utan dramatikk. Han er tatt hand om, og skal innom legevakt for sjekk før vidare oppfølging.

Oppdatert kl 08.25: Politiet har utvida sperreområdet og styrka bemanninga på staden. Ifølgje NRK trur dei no at mannen er væpna, og skildrar situasjonen som farleg.

Bakgrunn:

Måndag morgon står det fleire politibilar og ambulansar nær eit nabolag langs Byvegen. Delar av ein gangveg er sperra med politiband.

– Ein mann i 40-åra kom med nokre trugslar søndag kveld. Vi rykte ut, og har vore ved bustaden hans sidan 00.30-tida i natt, seier innsatsleiar Christian Meyer.

Politiet har ikkje mistanke om at det er andre personar i bustaden. Trugslane er retta mot nokon utanfor husstanden.

– Det har vore lite dialog gjennom natta, dessverre. Vi ønskjer kontakt med vedkomande, men har det ikkje travelt.

Politistyrken auka på morgonen, med minst seks bilar på plass.

Politiet er væpna, også hundepatrulje og skarpskyttar er på staden. Det same er tre ambulansar.

– Det har med alvorsgraden i trugslane å gjera, og historikken til vedkomande.

Politiet var på adressa også i februar i år.

Det er ukjent om vedkomande har våpen.