Vakker WT-bukett

I november i fjor fekk Os ein ny festival, WT Litteraturfestival, sett saman av gutane som i si tid starta filmfestivalen.

– Vi var veldig nøgde med debuten, med gode forfattarar på besøk, god stemning og bra med publikum.

– Men vi gjekk kanskje litt høgt ut i fjor, med enkelte programpunkt i storsalen i Oseana, som er litt for stor i forhold til publikumsmengda, seier Vidar Bratlund Mæland.

I år er blir Solbakkestova brukt meir, til fordel for Oseanasalen, medan Griegsamlinga i Oseana framleis er lokalisasjon for nokre av arrangementa.

– Griegsamlinga passar perfekt slik vi brukte lokalet i fjor, i storleik og i stemning, med god akustikk og nydeleg utsikt.

Prisvinnarar til Os

10 forfattarar og 1 animatør gjestar årets WT Litteraturfestival:

Bente Bratlund, Chris Tvedt, Eirik Ingebrigtsen, Gunnar Staalesen, Hans Jørgen Sandnes, Helge Kåre Fauskanger, Jørn Lire Horst, Kristian A. Bjørkelo, Lars Amund Vaage, Marit Kaldhol og Marit Reiersgård.

Her kan du lesa meir om forfattarane.

– Nokre er gjengangarar frå i fjor, nokre er nye. Vi er veldig nøgde med at vi får forfattarar som Marit Kaldhol, som har vunne så mange prisar, Marit Reiersgård, som debuterte med krim i 2012, mottakar av Brageprisen 2012, Lars Amund Vaage og vår eigen Eirik Ingebrigtsen, som vann Sultprisen 2013, til Os.

– Ryktet om festivalen har gått mellom forfattarar, eg vi er stolte over å ha fått ein sånn kvalitet også i år.

– Vi ser etter gode forfattarar som også er gode forteljarar. Der må eg også nemna Helge Kåre Fauskanger, som eg har høyrd to gongar, og som er veldig flink og har ein heilt spesiell stil. Han kan blant anna skriva og snakka flytande alvisk frå Tolkien, fortel Mæland.

Lesestund og skrivekurs

Første festivaldag stpr det kun skrivekurs på programmet. I Skriv ditt liv rettar kurshaldar Bente Bratlund seg mot godt vaksne, vaksne som vil skriva sine eigne historiar, og som vil læra meir om skriftleg framstilling.

– Vi har plass til 10 på kurset. Eg trur det er 7 påmeldte til no, fortel Vidar.

Fredag er det barnebokopplesing og novelleopplesing for ungdomsskuleelevar, på biblioteket, og besøk på ein barneskule i Os. På kvelden er det Krim ved fjorden med Gunnar Staalesen, Marit Reiersgård, Helge Kåre Fauskanger og Jørn Lier Horst, i Oseana, og konsert med Klaus Vatne i Solbakkestova.

– Det var litt artig, for vi inviterte Jon Fosse til festivalen. Vi liker han godt, men visste at han ikkje driv så mykje med opplesing. Han skreiv eit fantastisk brev der han takka nei, men sa det var kjekt om vi kunne bruka noko av materialet hans i ein samanheng under festivalen.

– Vi tok han på ordet, Vatne har sett melodi til tekstar av Fosse, seier Vidar med eit stort smil.

Braza på Røykenes

Laurdag legg WT-gutane opp til familiekos på Er-An Veikro.

– Saman med barnebøker og lesing har vi fått med oss Myrna Braza. Det blir nok stemningsfullt og fint når svigermora Bente skal lesa og Myrna skal stå for musikken, trur Mæland, som sjølv stiller med bøkene sine om Kald Kaffi Sauen.

Også laurdag er det bokbad i Griegsamlinga, då er det Lyrikk ved fjorden, med Lars Amund Vaage, Marit Kaldhol, Bente Bratlund og Eirik Ingebrigtsen.

På kvelden blir det konsert med forfattar Chris Tvedt sitt band, Gjengangerne, i Galleri Solbakestova.