Blindeforbundet sendte 14 medlemmar i lufta

Tok ein dag av «Opplevelsesuken» på Ulven.

Cecilie (t.v.) elskar å fly. Ingrid (t.h.) nekta først, men så gjekk ho fremst i køen. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøysøndag 08. aug. 2021 12:11

Laurdag var 14 medlemmar av Norges Blindeforbund på Vaksinen flyplass for å gå i lufta med Os Aero klubb.

– Eg håper dei får ein opplevelsesrik dag. Vi har fleire klubbmedlemmar som hjelper til i lufta og på bakken denne dagen, med alt frå drift og tryggleik til matlaging, slep og seglflyging i to skulefly, sa formann i klubben, Thomas Spengler, før start.

Besøket på flystripa er del av Norges Blindeforbund sitt årlege arrangement, «Opplevelsesuken», som i år går frå onsdag til søndag.

– Vi har base på Solvik syn- og mestringssenter på Askøy, og har hatt fleire utflukter, fortel Sturle Svendal.

Sturle Svendal frå Os sette seglfly på programmet til «Opplevelsesuken». (Foto: Kjetil Vasby Bruarøy)

Han er medlem av Blindeforbundet og ansvarleg for årets aktivitetsveke.

– Blindeforbundet har ei rekkje aktivitetar og kurs. Denne veka er retta mot unge vaksne mellom 30 og 55 år, og vi har deltakarar frå fleire landsdelar.

Tidlegare i veka har dei blant anna hatt omvising på Espeland fangeleir, vore på tur til Gullfjellet og padla SUP (stand up paddleboard) og kajakk.

– Elskar å fly

Nokre av deltakarane er svaksynte, andre er blinde.

To av deltakarane, Cecilie von der Ohe og Ingrid Fylling, hadde begge vore i seglfly då Midtsiden kom innom klubbhuset på Vaksinen.

– Eg liker ikkje så godt å reisa, men eg liker veldig godt å fly. Eg har flydd seglfly før, og eg har flydd helikopter og hoppa i fallskjerm, fortel Cecilie.

Fridomskjensla og suget i magen har gitt meirsmak.

– Det er ei stund sidan sist, så eg kasta meg med då Sturle sette det på programmet.

14 medlemmar blei slept opp i lufta i tur og orden. (Foto: Kjetil Vasby Bruarøy)

Ingrid Fylling var langt frå like begeistra.

– «Det skjer ikkje!» sa eg først, men så bestemte eg meg for å skubba grenser.

– Men eg ville vera ein av dei første, for eg orka ikkje sitja her på bakken og grua meg ein heil dag.

Ingrid har litt syn, og likte utsikta og flyturen. Ho fekk også prøva styrespaken ein periode.

Medlem i begge klubbane

Sturle Svendal er frå Os, og hadde lett for å koma på aeroklubben då han skulle setja opp programmet.

Ein av medlemmane i Blindeforbundet, Øystein Heggland, er også ein av veteranane i Os Aero klubb.

Han har flydd seglfly sidan 1970 og vore instruktør sidan 1974.

– Eg var vekke frå klubben ei stund, då ein hofteoperasjon gjorde at eg ikkje kom meg inn i flya. Då eg kom tilbake var det mange unge og for meg ukjente folk her, så då startar eg avdelinga «Gamlekara», der vi er over 70 medlemmar.

Han set pris på begge medlemsskapa sine.

Øystein Heggland har flydd seglfly sidan 1970. No er han svaksynt og medlem av begge. (Foto: Kjetil Vasby Bruarøy)

– Eg fekk ein betennelse som tok frå meg mykje av synet for eit par år sidan, men har fått veldig mykje god hjelp av Blindeforbundet, ikkje minst på senteret dei har på Askøy.

– Eg har også fått god hjelp av nye venar i Blindeforbundet. Han eine ser ingenting, men har vore heime hos meg privat og hjelpt meg med dataen. Han er ein racer der.

Dei to har også snakka om at det hadde vore kjekt å få fleire svaksynte og blinde opp i seglfly.

– I dag er det kjekt å sjå så mange på plass for å fly, nokre av dei for første gong.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.