Sport | 31. juli 2015

Budd på ein spennande sesong

Ny trenar, ein sesong med moglegheit for opprykk til nasjonal serie og vitjing av Tertnes i NM. Handballdamene er i gang med oppkøyringa.

Budd på ein spennande sesong
Trond Førde Eriksen er ny trenar for Os-damene og er aktivt med på gulvet når øvelsane skal demonstrerast (Foto: Andris Hamre)
Andris Hamrefredag 31. juli 2015 08:10

Etter at Os og Jesper Svensson avslutta samarbeidet i fjor haust blei fjorårssesongen litt annerleis enn tenkt for Osdamene. Gitte Torp tok på seg å vera hovudtrenar også for damene og det viktigaste målet var å halda seg i 2. divisjon.

Tysdag starta Os-damene oppkøyringa etter ferien med ny trenar på plass.

Trond og Gitte tar styringa

Trond Førde Eriksen, Mathopen-gut med internasjonal spelarerfaring og det norske landslaget blir i år å finna på Osbenken. Gitte Torp held fram, men no som assistent-trenar etter eige ønske.

Førde Eriksen kjem frå trenarjobben for Kjøkkelvik sine 2. divisjonsdamer. Tidlegare har han trent både herre- og damelaget til Sotra og fleire aldersbestemte lag.

– Kvifor Os?

– Det er jo den beste klubben i Bergensområdet, smilar han breidt og ler.

– Dessuten liker eg opplegget her og kjente nokre av dei i klubben frå før. Gitte kjenner eg frå før, så eg visste at eg ville få hyggelege folk rundt meg.

– I tillegg har Os ein stor og god gjeng med jenter som har lyst til å bli betre og som er motiverte. Det trigga meg og er med på å motivera meg som trenar, fortel Førde Eriksen.

48 landskamper

Den nye ostrenaren har ei solid spelarerfaring som han håpar Osjentene kan dra nytte av i den kommande sesongen.

– Du har vært proff og på landslaget?

– Ja, eg har spelt i Fyllingen, 3 år i Stavanger IF og 2 år i Viking før eg reiste til Danmark kor eg var heiltids handballspelar. Eg spelte 3 år i Ålborg, 2 i Skern og 2 i Malmø før eg la skoa på hylla. Diverre blei ikkje Danmark-opphaldet heilt som eg hadde håpa på då eg øydela skuldra tidleg, men det blei nå nokon år.

Førde Eriksen har òg 21 juniorlandskampar og 27 landskampar for A-landslaget. Totalt putta han 75 mål med det norske flagget på brystet.

Travel oppkøyring

Denne veka starta Osjentene opphøyringa heime i Oshallen. Allereie om 14 dager spelar dei dei første treningskampane.

– Vi har avtalt med Stord at vi skal koma ned der den 15. for å spele to kampar mot dei. Helga etter reiser vi til Strandebarm for treningsleir, kor også Fana har lagt si oppkøyring. Helga der etter er det opningscup i Bergen, så no er vi i gang, smiler Førde Eriksen.

Tertnes og mål om nasjonal serie

I 1. runde NM møter Osdamene gamleklubben til trenaren, Sotra, heime i Oshallen.

– Dato er ikkje satt enno, men det er sjølvsagt ein kamp eg har lyst å vinna. Gjer vi det, får vi eliteseriejentene frå Tertnes opp her i neste runde.

– Kva er målet i serien då?

– 2. divisjon blir lagt om til ein nasjonal serie etter denne sesongen. Det er eit uttalt mål at der skal Os vera med. Skal vi klara det, så må vi vera på øvre halvleik av tabellen.

Ser bra ut

Førde Eriksen tok over laget i midten av mai og hadde treningar med jentene også før ferien.

– Eg tykkjer det ser bra. No skal vi berre jobba på inn mot seriestart, avsluttar Førde Eriksen.

Første seriekamp går borte 19. september mot Sotra.

Spennande? Vil du ha ukas høgdepunkt i innboksen?

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen

For å få tilgang til alle sakene i appen må du vera abonnent.