Debuterer som barnebokforfattar i dag

I dag blei barneboka «Den Magiske Urmakeren» lansert av det nystarta forlaget Bespoke Publishing AS.

Studiekameratane Simen Moesgård frå Os og Fredrik Opheim frå Arendal står saman med illustratør Kristin Askland bak boka.

Simen og Fredrik er også gründerane bak forlaget.

– Ingen av oss hadde plan om å bli forfattar. Utgangspunktet var at Fredrik er enormt interessert i klokker, noko som smitta over på meg då vi studerte i lag.

– Vi har halde kontakten etter studietida, og i ein samtale i februar i år så byrja vi å snakka om klokker igjen.

– Då Fredrik spurde om ikkje vi skulle laga ei barnebok i lag, med klokker som element i handlinga, sa eg av ein eller annan grunn ja på strak arm, seier Simen og ler.

Han har tidlegare vist seg frå ei kunstnerisk side i heimbygda, men då innan musikk.

Les ògFeiringa på Kyrkjeflaten

– Ventar ikkje å tena oss rike på dette

Det var ikkje litteratur eller pedagogikk dei to studerte.

Simen tok ein bachelor i sal og marknadsføring, og har blant anna jobba som marknadsansvarleg for ØIF Arendal, som har eitt av Norges beste lag i herrehandball.

No bur han i Danmark, der faren kjem frå, og jobbar med sal mot den norske marknaden. Frå i dag skal han også selja bøker til heimlandet, for boka er foreløpig berre med norsk tekst.

– Dette er noko vi har gjort berre fordi vi fekk lyst. Vi starta vårt eige forlag, fekk tak i illustratør og, etter kvart, ein redaktør. Heldigvis, for han gav oss MANGE gode råd, det hadde ikkje gått utan han.

Boka er trykt opp i 500 eksemplar og blir foreløpig berre selt via heimesida til forlaget. I tillegg jobbar dei med å få distribusjon via nokre urmakarar.

– Vi har full jobb og travle dagar begge to, og reknar ikkje med å tena pengar på dette. Men det er kjekt om nokon finn glede av boka, og om prosjektet ein dag går i null.

Klokker og tidsreiser

Litt av forretningsideen var at Fredrik og Simen ikkje er dei einaste i Norge som er interesserte i klokker.

– Det er forum i Norge med over 80.000 klokkeinteresserte.

– No er ikkje dette ei teknisk bok om klokker, men kllokkeinteresserte som les den for ungane sine, vil nok finne ekstra glede av den, trur Simen.

Boka handlar nemleg om ein urmaker som forsvinn, og om sonen Georg (10), som prøver å finna han.

Faren forsvann fordi klokkene hans også er tidsmaskin, han har forsvunne til ein annan epoke. Så er det opp til Georg å finna rett klokke til epoken faren er i, så dei kan reisa heim til rett tid.

Klokkene er i boka er dessutan ganske auteniske, og frå ulike tidepokar.

– Vi har laga ein liten nettbutikk, og er spente på responsen, seier debutanten.