Inviterer heile bygda på utekino igjen
Nabolaget i Halhjemsmarka lagar «jul rundt svingen» søndag.
Før jul i fjor, etter å ha pynta husa sine litt meir enn snittet, bestemte naboane Kent-Eivind Storum, Torodd Bolstad, Christian Hitland og Eivind Storli seg for å laga utekino igjen.
– I år er òg Atle Hornes og Roy Arentzen med på dugnaden med å stella i stand, fortel Kent-Eivind.
Tradisjonen starta i 2017 og inkluderer gratis utekino for ungar i nabolaget - og alle andre som ønskjer å koma.
– Årets film er animasjonvarianten av Grinchen.
Utekinoen har sjølvsagt eigen kiosk. Der blir det selt blant anna popcorn, hotdog, kakao og kaffi.
– Inntektene går i år til Hjartetre.
Tilreisande med bil blir oppmoda å finna seg ein parkeringsplass på avstand, gjerne ved idrettsanlegget, og spasera opp til jul rundt svingen ved Halhjemsmarka 260.
– Hugs varme klede og noko å sitja på. Vi set fram ein del stolar, men har ikkje ubegrensa mengde.
Det er meldt sludd og snø på dagtid søndag, men opphald og to plussgradar frå ettermiddagen.
Filmframvisinga startar klokka 17.30.