– Korleis har dei klart dette?

Os Lakk og Karosseri har blitt sertifisert som Miljøfyrtårn.

– «Korleis har dei klart dette», var det første som slo meg, sa ordførar Trine Lindborg (Ap) då ho i går overrekte diplom og bukett saman med næringssjef Jon Sivert Rykkel.

Dette er Miljøfyrtårn nummer 25 i kommunen, men den første bilverkstaden, og ein av dei første verkstadane i fylket.

– Dei driv dessutan med lakkering, og eg såg for meg mykje spesialavfall og nokre krevjande steg for å bli sertifisert.

Målet er at fyrtårnstatusen ikkje berre skal vera eit steg i retning reinare miljø, men at det også skal vera lønsamt.

– Eg reknar med kommunen no veit kvar dei skal levera bilane sine når dei bulkar, seier tidlegare Os Lakk-sjef Ketil Halhjem muntert.

Bevisste innkjøp

Karl Tore Bjaanes Gjerde, som overtok verkstaden etter Ketil Halhjem i 2019, fortel kva grep han måtte ta for å klara krava.

Les ògSelte verkstaden til «læreguten»

– Det er ein del krav til bransjen frå før. Miljøfyrtårn-sertifiseringa handlar mykje om innkjøp, at du har oversikt over kva varer du bruker, og at du har sjekka desse opp mot alternativ som kan vera betre for miljøet, forklarer han.

Det var ikkje eit krav at alle innkjøp og metodar måtte endrast til noko betre over natta, om det fanst noko betre, men at du viste til ein plan i mindre forureinande retning.

Bildeserie:

1 av 5

Likevel tok Gjerde ei større investering med det same.

– Vi tar mykje understellsbehandling, som beskyttelse mot rust, både på heilt nye bilar, og for bileigarar som litt seinare kjem på at dei vil forlenga levetida på karosseriet.

– No har vi skifta til varmvoks. Det påverkar ikkje pris eller kvalitet, men i innkjøp og opplæring bruker vi ein del pengar og tid for å få dette i gang.

Mens Midtsiden var på staden var Corrosafe AS i ferd med å ferdigstilla og ta opplæring i bruk.

– Dette er det siste nye frå Dinitrol, det er framtidas anlegg både når det kjem til utslepp for miljø og arbeidsmiljø, og slitestyrke på det vi leverer til kunden, seier Jan Inge Håland frå Corrosafe.

Nøye sortering

Det meste arbeidet har handla om dokumentasjon og innkjøp, men avfall er naturlegvis ein del av totalbildet.

– Der er vi nøye frå før, og har mykje sortering, seier Gjerde og ramsar opp;

– Frå metall og plast frå karosseri til dekkeplast, papp og spesialavfall. Spesialavfallet går i eigen konteinar, men sortert i fleire fraksjonar inne i konteinaren.