Lyser ut 800.000 kroner til ro- og padleruter
Kan få støtte til både kartlegging og fysisk tilrettelegging.
No kan kommunar og interkommunale friluftsorganisasjonar søkja fylkeskommunen om pengar til både kartlegging av ro- og padleruter og fysisk tilrettelegging for padling og roing.
Alle kommunane i Vestland har kystlinje, og til saman har fylket ei oppstykka kystlinje på 19.339 kilometer med fjordar og øyer (Australia har 25.760 km).
Det betyr gode naturgitte forhold for å ta seg fram sjøvegen.
No tek Vestland fylkeskommune gjennom prosjektet «Ro- og padleruter i Vestland» ei koordinerande rolle i arbeidet med å legga endå betre til rette.
Kartlegging og infrastruktur
Kommunar og friluftsorganisasjonar kan altså få støtte til både kartlegging og fysisk tilrettelegging.
Kartlegging kan gå ut på å til dømes skaffe seg oversikt over både sjølve ro- og padlerutene, men også tilknytt infrastruktur.
Det kan vera parkeringsplassar, utsetjingsbrygger, toalett og anna.
Fysisk tilrettelegging kan vera til dømes skilting, bygging av ramper/brygger, utbetring av tilknytte fasilitetar som toalett, overnattingsmoglegheiter og anna.
Frist 15. september
I tillegg kan friluftsråda søkja om tilskot til å gjennomføra eigne tilretteleggingsprosjekt retta mot roing og padling i Vestland.
Tilrettelegginga må då vera i tilknyting til eksisterande eller framtidige ro- og padleruter.
Fristen for å søkja midlar er 15. september.
