Meldt etter aggressiv åtferd på apotek

Måndag klokka 14.43 fekk politiet melding om ein trugande mann på eit av apoteka i Os sentrum.

– Han fekk ikkje medisinen han ba om, og framsto som rusa, trugande og aggressiv, fortel politioverbetjent Anne Lyssand.

Då patruljen kom fram møtte dei mistenkte utanfor apoteket.

Vedkomande, ein mann i 20-åra, blei meldt for å uroa offentleg fred og orden, og fekk pålegg om å halda seg vekke frå Os sentrum til klokka 08 tysdag.

Filma drosje på veg til Bergen

Klokka 01.24 natt til tysdag blei politiet oppringt av ein bilist på veg til Bergen.

– Han fortalte at ein drosje køyrde tett opp i hekken på bilen hans, og seinare tok ei farleg forbikøyring.

Drosjen blei stoppa rett før Skjoldskiftet. Då kom også meldar og viste film av køyringa.

– Patruljen fann ikkje noko kritikkverdig på filmen, eller med drosjesjåføren, så han fekk køyra vidare.

– Drosjen ser ikkje ut til å vera frå Os Taxi, seier Lyssand.