Morgonkontroll på Fanafjellet

Statens vegvesen hadde kontroll på Fanafjellet onsdag morgon, fem dagar før ny E39 opnar mellom Os og Fana.

Av 765 bilar som køyrde gjennom skiltskanner (ANPR), blei berre 3 stoppa.

– Ein av dei hadde gløymd EU-kontroll, og blei avskilta. Dei to andre hadde gløymd etterkontrollen. Bileigarane fekk køyra vidare, til verkstad, for å få den utført, fortel Lars Harald Drange frå Statens vegvesen i rapporten.

202 køyretøy blei kontrollert, utanom dei 3 ny-skanna som blei vinka inn.

– Det var stort sett lite å bemerka, men vi ser at fleire bør ta ein runde rundt sin eigen bil og sjekka både lys og dekk.

Det blei skrive ut 34 mangellappar.

– Mykje av dette var ulike manglar på lys, men det var også nokre manglar som handla om dårlege bremsar.

Ein av bilistane måtte sikra last på tilhengar betre, og fekk i tillegg loggført ein teknisk mangel.