Os stilte sterkt i NM for gatelag
Prestasjonane var òg betre enn før.
Ein delegasjon på 21 representantar frå Os, 5 i lagleiinga og 16 spelarar, reiste 06 fredag morgon til Kristiansand for å delta i NM for gatelag.
Os stilte med både herre- og damelag.
– Laga består av både rutinerte spelarar og eit par NM-debutantar på kvart av laga, fortel coach for herrelaget, Lars Petter Grønvigh.
– Vi tok frukost på Halhjemsferja, lunsj på Vikeså og siste dopause i Lyngdal.
Os har sjølv arrangert cup for gatelag på Kuventræ. I 2023 stilte dei i NM for første gong.
Årets NM gjekk på Sørlandet. Ankomst Kristiansand var 14.30. Så var det berre til å gjera seg klar for parade.
Bildeserie:
Sportsleg sett blei det gode resultat.
– Begge lag vann fleire kampar. Vi merker at vi slepp inn færre mål og skårar fleire, det er gode teikn, seier Grønvigh.
Sosialt blei det òg suksess.
Herrelaget landa samla sett som nummer 21, opp 4 plassar frå førre bestenotering.
Damene tok ein sterk 2. plass i B-sluttspelet.
Her er nokre glimt frå kampane:
Bildeserie:
Herrelaget sin første kamp gjekk mot vertane, Kristiansand.
Os leia til pause, men tapte.
Damene spelte rett etterpå.
– Dei tapte den første, men fleire av spelarane blei lagt merke til av landslagsleiinga for gatefotball.
Damene starta laurdagen med tap for Trøndelag, men så snudde det, med siger over både Sandvika og Fredrikstad.
Dermed var dei vidare i sluttspelet.
I første kamp i sluttspelet vann Os-damene 5-2 over Agder.
Laurdagen starta for herrelaget sin del med tap for Larvik. Os hadde ein sterk førsteomgang, men gjekk på eit knipent tap.
– Det var i periodar gneistrande spel! seier Lars Petter.
I sluttspelet for herrar gjekk Os først på eit knipent tap for så å vinna heile 6-1.
– Kvelden blei avslutta med ein fantastisk fin bankett på KRS Live.
Trass bankett laurdag, det var fleire kampar søndag.
Der avslutta Os-herrane med ein uhyre spennande kamp. Den enda med 8-7 siger til Os over Farsund.
Damene sin siste kamp blei ikkje mindre spennande. Den enda i straffesparkkonkurranse, ein konkurranse Os tapte for Haugesund.
– Vi fekk ikkje sommarvêret Kristiansand er kjent for, men 10-13 gradar, vind og regn. Men det blei ei helg med spennande kampar, fine opplevingar og mykje venskap og meistring, seier Lars Petter.
