President i Norges Golfforbund (NGF) Marit Wiig besøkte Bjørnefjorden Golfklubb laurdag. (Foto: Kjetil Vasby Bruarøy)

Presidenten besøkte golfjubilanten

– Ein nydeleg bane og ein veldriven klubb, seier Marit Wiig om Bjørnefjorden Golfklubb.

image
image
image
image
image
image
image
image
image
image
image
image
Av: Kjetil Vasby Bruarøy

Bjørnefjorden Golfklubb fyller 25 år i november. Denne helga markerer dei jubileet sitt, i går med parturnering og besøk av president og ordførarar, i dag med ope hus og aktivitetar for store og små.

Tidlegare i veka fortalte Erik Just-Olsen om historia til klubben, og styreleiar Eli-Karin Wiberg om dagens drift og bemanning.

Etter parturnering laurdag (resultat lengre nede i artikkelen) var det tid for grillmat, talar og gåveoverrekkingar.

Just Olsen fortalte om historia og hylla klubbens beste spelarar, Solveig Helgesen og Øystein Engevik. Øystein hadde sendt ei helsing på sms, Solveig var sjølv på plass på Hauge. Erik takka samtidig både grunneigarar, dei to æresmedlemmane, Oddvard Olsen og Arne Totland, og andre sentrale personar i klubben.

Så fekk presidenten ordet.

– Her kan du ikkje skulda på andre enn deg sjølv

President Marit Wiig har blant anna vore seniorrådgjevar i Verdensbanken i Washington, direktør i NHO og spesialrådgjevar ved Senter for statlig økonomistyring. Ho har vore seriemeister i handball fleire gongar, visepresident i Norges Håndballforbund og styremedlem i Norges olympiske komité.

I går gjekk ho ein runde på Hauge.

– Det var ein nydeleg bane! Krevjande og spennande, og med nokre fantastisk fine greenar. Her kan du ikkje skulda på andre enn deg sjølv om du missar, seier Wiig om Bjørnefjorden Golfklubb.

Gav ros til klubben - og sporten

Wiig sa ja med éin gong ho fekk invitasjonen til å delta på jubileumsmarkeringa.

– Bjørnefjorden Golfklubb er ein veldriven klubb på alle måtar. Dei stiller opp når forbundet ber om det, dei har aktive utøvarar frå junior til veteran og dei er ein viktig arena for fleire grupper i helsesektoren.

Presidenten plukka opp tråden der Just Olsen avslutta; golf i folkehelseperspektiv og framtida til arealet klubben bruker.

– Eg håper kommunen tenkjer langt fram i arealpolitikken sin. Det er mange sparte helseutgifter i det å gi gode levevilkår for ein klubb som denne.

Grøne løfte og ambisjonar

Ordførar i Os, Terje Søviknes (Frp), og ordførar i Fusa, Atle Kvåle (Ap), hadde som presdienten med seg gåver og fine ord.

– Det har blitt lagt ned veldig mykje godt arbeid både med bane, klubbhus og klubbdrift, og eg er klar over at golf er viktig i folkehelseperspektiv. No har eg førebels til gode å sjå eldre- og folkehelseministeren (Sylvi Listhaug) spela golf, men eg trur eg vil utfordra ho, sa Søviknes.

– Det er berre eit tidsspørsmål, kom det i replikk fra president Wiig.

Søviknes la til at han ikkje har blitt ein habil spelar sjølv, men at han har likt seg godt på golbanen når han har blitt invitert.

– Når det kjem til areal, så ser de av arealplanen som nyleg kom ut til ettersyn at golfbanen er del av ein stor, grøn ring aust for Os sentrum. Vi treng eit grøntareal som dette nær sentrum i ein kommune i vekst.

Frå 1. januar er Os slått saman med Fusa. Golfklubben var tidleg ute med å ta Bjørnefjorden-namnet, om enn med «e». Atle Kvåle er glad for at han snart får ein golfbane i eigen heimkommune.

– Då klubben blei stifta meinte grunneigar Samson Bjørke at det var plass til ein som meg i klubben. Eg meldte meg inn og kjøpte andelsbrev, men har ikkje kome i gang med spelet.

– Saman med skiskyttaranlagg og sandvolleyball i Fusa får Bjørnafjorden kommune no eit svært rikt tilbod. Eg meiner vi ikkje berre skal vera stolt av 9-holsbanen, men løfta blikket og satsa på utviding til 18 hol! sa Kvåle til begeistring, latter og applaus.

– Det er sånn eg er som person, når Søviknes seier noko, så legg eg på, humra Kvåle og overrekte blomar til Wiberg.

Frå klokka 12 i dag, uansett vêr, held jubileet fram med open dag på Hauge.

Rundt 60 spelarar deltok i jubileumsparturneringa.

Her er topp 10:
1. Anja Sandvik / Roald Eriksen +13pF49
2. Martin Skorpen Eck / Kristian Skorpen Eck +11pF47
3. Anita Kristin Egge / Ørnulf Jacobsen +10pF46
4. Eli Karin Wiberg / Bjarte Wiberg +8pF44
5. Øyvind Pedersen / Mathias G. Pedersen +8pF44
6. Johan Helland / John Henrik Lepsøy +8pF44
7. John Arntzen / Rolf Olsen +7pF43
8. Ottar Blokhus / Bjørn Lunde +6pF42
9. Torleif Gundesø / Arne Karsten Totland +5pF41
10. Geir Engelsen / Trond Thorsø +5pF41

Fleire saker