Reagerer på bålbrenning inni gapahuk

I 2020, årets før dagsturhytta Borgabu blei opna, var Brukameratane ferdige med gapahuken Borgly på same fjelltopp.

I dag fekk ein av Brukameratane, dugnadsgjengen som blant anna står bak Knutabruo, tips om bålbrenning inne i gapahuken.

Les ògLos i Os: Borgafjellet, Borgly og Borgabu

– Det var ein representant frå Os Turlag som tipsa og sendte bilde. Dei har tilsyn med Borgabuo, men var også bortom gapahuken. Det såg dei restane etter to bål, eitt på utsida og eitt inne på bakken i gapahuken, fortel Peder Fløysand.

– Eg vil be turgåarar varma seg på ein annan måte, så ikkje folk tar på seg risiko for at gapahuken brenn ned, eller at dei startar ein lyngbrann. Det er ikkje bekk eller vatn i umiddelbar nærleik, så den kunne i så fall blitt krevjande å sløkka.

Fungerande brannsjef (mens ny brannsjef Espen Storum er i pappaperm), Erik Walden, kjem også med ei åtvaring.

– Det er ikkje mange vekene sidan brann i ein trafo i Hålandsdalen svidde av tre mål. Det var rett nok før snøen kom, men sjølv om det er kaldt kan brann fort spreia seg når det er så tørt som no, seier Walden.

– Det er god lufting nede på denne gapahuken, men med møne og tett tak kan det vera fare for at røyk samlar seg oppunder taket, og at branngassane blir varme og tenner. Då kan gapahuken fort brenna ned.

Han oppmodar folk å tenkja «worst case» før dei tenner bål.

– Du må spørja deg sjølv; kva er det verste som kan skje, og førebu deg på nettopp det.