Lysekloster il | 26. juni 2022

Snudde tøff kamp mot Fana

To straffar og ein utvist trenar i lokaloppgjer på Nesttun.

Lionel Kamanzi, her heime mot Djerv 1919 (3-1-siger) i vår, blei matchvinnar i går. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøysøndag 26. juni 2022 09:34

Fana - Lysekloster 1-2 (1-1)

Lysekloster spelte laurdag sin 12. serierunde. Kampen gjekk borte mot Fana.

Sist Lysekloster slo Fana var 5-0 og 0-1 i 2018. I 2019 og 2021 blei det til saman tre tap.

Toppskårar for Lysekloster i fjor, Tim Nilsen, sendte Fana i leiinga med 1-0-skåring i 6. speleminutt.

– Vi sleit litt med defensiv struktur i første omgang, men det var ganske store sjansar til begge lag likevel, seier Lysekloster-trenar Ruben Hetlevik.

Ganske nysignerte Alexander Dang skåra sitt første for Lysekloster då han utlikna på straffe sju minutt seinare.

Også Fana fekk straffe, på stillinga 1-1, men Vitalijs Melnicenko redda og blei kåra til dagens Lysekloster-spelar.

Lionel Kamanzi blei matchvinnar då han, på eit langskot via ein Fana-fot, sette inn 1-2 i 66. minutt.

Sikra sigeren

– Kamanzi er eit arbeidsjern, og eg er endå meir imponert over det han gjorde etter skåringa, då vi ville lukka ned kampen og sikra sigeren, seier Hetlevik.

– Fana jobba hardt for utlikning sist kvarteret. Eg er nøgd med måten vi har klart å forsvara leiing på i innspurten i nokre av dei siste kampane.

Dette er Lysekloster sin fjerde siger på rad.

Det blei i alt delt ut fem gule kort i kampen, to av dei til Fana-trenaren frå Os, Ørjan Håland (55. og 90.).

Den nysignerte midtstopparen Nicholas Marthinussen fekk debuten sin for Lysekloster då han kom innpå i eit defensivt byte for Dang i 84. minutt.

Framleis tett tabell

Brann 2 på 1. plass og Brodd på 3. plass vann også sine kampar, Lysekloster held seg på 2. plass a-poeng med Brodd og 7 poeng bak Brann 2.

Fana ligg framleis på 4. plass, men både Viking 2 og Bjarg på 8. og 9. plass vil med siger i dag gå forbi.

Lysekloster speler også neste kamp på bortebane. Den går mot Sandnes Ulf 2 på 10. plass.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.