– Sonen min ringte frå kjellaren då nokon tok i dørhandtaket
Fleire har hatt folk utanfor huset sitt på nattestid i helga.
I dag fortalte politiet om ein kombinasjon av lusking i hagen og gjentatte trykk på ringerklokka til ein bustad i Varåsen natt til søndag.
Natt til måndag skjedde noko liknande i Nordstølen på Nore Neset.
– Eg hadde ikkje tenkt å varsla noko vidare, men då eg las om episoden i Varåsen, og det kanskje kan ha samanheng, prøvde eg å kontakta politiet, fortel huseigar.
Han kom ikkje gjennom på telefon til politiet, og ringte Midtsiden for å fortelja om episoden.
– Nokon var utanfor kjellaretasjen vår i natt. Sonen vår har soverom i etasjen, og ringte oppover i etasjane då han høyrde lydar utanfor.
Det var i 01.50-tida.
– Vedkomande hadde både vandra utanfor husveggen og tatt i dørhandtaket. Det høyrdes òg ut som om han snakka med nokon. Om dei var fleire, eller om han snakka i telefonen, er uvisst.
Ein innbyggar i Varåsen fortel om tjuveri av elsparkesykkel og hjelm frå ein bod i Varåsen i helga, ein tipsar fortel at nokon har ripa eit kryss på yttardøra til ein huseigar i Stølsmyro.
BT skriv i dag om tre innbrot i bustadar på Litlesotra fredag.
