– Vaksen mann sprang frå staden

Politiet fekk i går melding om eit tjuveri som skjedde frå ein bustad natt til søndag.

– Eit ektepar som bur nær Amfisenteret høyrde støy utanfor huset, skrik og skrål og romstering. Så såg dei ein mann som sprang frå staden, fortel politioverbetjent Anne Lyssand.

Mannen såg ut til å vera i 40-åra.

– Huseigar har oppdaga at nokon hadde vore i boden deira, og at ein del til hageslangen er stole. Han vil ikkje melda seg, men berre fortelja politiet om episoden.

Klagde på støy frå mopedar

Tysdag fekk politiet ein klage på støy frå mopedar på veg opp og ned Idrettsvegen.

– Innringar var lei av bråk på ettermiddag og kveld. Vi har frå før fokus på tohjulingar, og stopper ganske ofte mopedar som er trimma eller har ei eller anna form for ulovleg tilpassing, som gjerne medfører ekstra støy.

Betalte omregistrering på staden

I 23-tida tysdag stoppa politiet ein bil som mangla både det eine bremselyset og det eine køyrelyset.

Det viste seg at bilen var begjært avskilta grunna manglande omregistrering, men denne betalte eigar på staden, så han fekk køyra vidare.

Han må visa bilen med velfungerande lys for vegvesenet innan 14. september.