Vann prisen: Amalie er Norges mest hyggelege lærling

I midten av august blei det kjent at Amalie Strønen Olsen frå Os var blant finalistane i årets kåring av Norges Hyggeligste Håndverker.

Amalie skifta retning, frå bachelor i reiseliv til å bygga hus.

Les ògAmalie skifta yrkesretning - no er ho finalist i Norges Hyggeligste

I kveld var det finale og kåring av vinnarar blant 24 finalistar i 8 ulike kategoriar.

Amalie Strønen Olsen gjekk til topps i kategorien lærling.

– Det føles veldig bra og veldig uforventa. Norges Hyggeligste Håndverker har betydd veldig mykje for meg, seier Amilie ifølgje ei pressemelding frå arrangørane av den store kåringa.

– Amalie er ein veldig flott rollemodell som har tatt bevisste val i livet, og som har lidenskap for faget sitt, seier jurymedlem og dagleg leiar i Boligmappa, Erling Olaussen.

– Ho gjer dessutan ein stor jobb med å framsnakka faget, og er dermed eit stort forbilde for andre som vil følgja hennar spor.

Amalie er lærling hos Byggmester Aarvik.

– Amalie er veldig dyktig og strukturert. I tillegg er ho veldig blid og initiativrik, og har ved sidan av lærlingjobben tatt over styringa av instagramkontoen vår, sa dagleg leiar Bjarte Aarvik til Midtsiden i samband med finaleplassen i august.

Fleire frå Os har vore nominert og til finale før. Strønen Olsen er den første som går heilt til topps.