Dødspopulært i 2012

Konsertar, fotballkampar, revyar, båtmesse, skimesse og enkelte stunt er blant det vi i Midtsiden-redaksjonen har filma i året som snart er over.

Til saman har vi publisert 70 artiklar med video.

Vil du kosa deg med litt "lokal-TV" i romjula?
Her er samleside med alle artiklar med video.

Nokre videoar er sett fleire gongar enn andre.

Her er topp 10 i 2012:

1. Sjøsetting av "Hamnesjefen"
24. januar 2012: Etter å ha vore på land for behandling av blyforgifting blei pappa-svanen i flokken i Oselvo sett på elva igjen. Der låg familien og venta, og dansen mellom svanefar og svanemor var så sjarmerande at vi har sjeldan vore så glad for at vi har switcha over frå foto til film når vi har vore ute på ei sak. Både TV2 og VG kjøpte seinare videosnutten av Midtsiden.
Sett 2.480 gongar.

2. Osmeisterskapen i dødsing
3. desember 2012: Midtsiden var dessverre opptatt og kunne ikkje fanga denne spreke konkurransen på film, men vi lånte vekk litt utstyr, til ein har har ein del utstyr frå før, og fekk sportsfotograf Thomas Bøthun til å filma for oss. Filmen har berre lagt på lufta ein liten månad, men er likevel blant dei mest sette.
Sett 1.578 gongar.

3. Vegard Leite på Nore Neset
29. desember 2011: Vegard Leite kom på 2. plass i Idol hausten 2011 og kom til Os for å spela konsert i Nore Neset Akivitetshus i romjula.
Sett 1.280 gongar.

4. ORBO med song til Os
11. november 2012: Ole Reinert Berg-Olsen kjem med ny plate, på norsk, 8. mars 2013. Under WT Literaturfestival sleppte han låta "Heim til Os", der han har med seg Os Mannskor. Singelen er sendt ut som julehelsing til husstandane i Os.
Sett 1.256 gongar.

5. Fonos med flashmob på AMFI Os
1. desember 2012: Som eit stunt for å marknadsføra julekonserten til Fonos stilte delar av koret opp på AMFI Os og gjennomførte ein vellykka flashmob-framføring. Midtsiden fekk publisera eit privat opptak av stuntet.
Sett 1.224 gongar.

6. UKM for Os og Fusa
5. februar 2012: Ungdomens kulturmønstring hadde i februar i år felles lokalmønstring for Os og Fusa i Oseana. Det skal dei ha i februar 2013 også. Filmen frå mønstringa er blant dei mest sette videosnuttane på Midtsiden i år.
Sett 1.175 gongar.

7. What are Words på Os ungdomsskule
17. januar 2012: Show med Os ungdomsskule der Torbjørn Sandmo song 42 låtar i eitt drag.
Sett 1.137 gongar.

8. St Hans i Mobergsvikjo
24. juni 2012: Det blei ei varm og fin St Hans-feiring i nyoppussa Mobergsvikjo i år, der Os Spelemannslag og Os Durspelsamskipnad sto for den musikalske delen av stemninga.
Sett 1.012 gongar.

9. Intervju med Rolf Klausen
24. januar 2012: Rolf Klausen, kjent for sin innsats som speaker på A-laget til Os sine heimekampar, blei alvorleg skadd då han blei påkjørt av ein bil i september 2011. I januar i år fekk vi eit intervju med Klausen, og valte å ta delar av intervjuet på video, så fleire kunne sjå kor pigg og opplagt han hadde blitt.
Sett 950 gongar.

10. Standup på Irish Cat
9. april 2012: Standup på Irish Cat har vore eit nytt og populært kulturtilbod i Os i år. Vi var med på påske-standup med Olav Svarstad Haugland, Ørjan Buen, Ole Soo, Pål Rønelv og Stian Blipp, som no er programleiar på TV2. Her ser du utdrag av alle fem, inkludert beatboxing av Blipp.
Sett 948 gongar.