Etter ei testkøyring hos Os Caravan i oktober opna Lukasz Brekke matvogna Lunsj-Ekspressen med faste opningstider i slutten av november i fjor.
I over fire månadar har Lunsj-Ekspressen stått mellom Os vgs og Røde Kors-huset i Kolskogheiane.
– Det har vore ei fin tid med fleire faste kundar som har svingt innom, og nok omsetnad til å ta ut løn til tilsette, seier Lukasz, som har hatt god hjelp i matvogna når han sjølv har vore i Nordsjøen på jobb eller opptatt med andre oppdrag heime.
– Vi fekk nokre frukostkundar, men ikkje nok til å forsvara så tidleg opning, så vi reduserte opningstida frå 06 til 09. Elles har vi halde det gåande som planlagt.
Flyttar til Plantasjen
Men no held Lunsj-Ekspressen stengt ut april. I starten på mai opnar den igjen på ny adresse.
– Vi har hatt det bra i Industrivegen, men ønskjer å stå endå meir synleg for forbipasserande trafikk, fortel han.
Frå mai finn du matvogna til Lunsj-Ekspresen på parkeringsplassen utanfor Plantasjen på Gudriflaten.
![Lukasz byr på heimelaga baguettar i den ombygde pannekakevogna. (Foto: Kjetil Vasby Bruarøy)](/_next/image?url=https%3A%2F%2Fcdn.sanity.io%2Fimages%2Fahcmq7tx%2Fproduction%2Ff83a05351d5af1b9cc2dd417c21777121cd78589-3600x2400.jpg%3Frect%3D0%2C121%2C3600%2C2159%26w%3D752%26h%3D451%26q%3D100%26dpr%3D2&w=3840&q=75)
– Eg trur det blir endå betre. Der er det tettare på ein meir trafikert veg, det er fleire butikkar i området og fleire bustadar i same nabolag.
– Blir opningstidene dei same, måndag til fredag?
– Det har vi ikkje bestemt enno. Eg har ein ambisjon om også ha ope om laurdagane, men det kjem an på både bemanning og omsetnad. Vi opnar i starten på mai, og så kan det bli nokre justeringar etterkvart.
Vil til sentrum i sommar
I sommar kan det bli ny flytting.
– Eg ønskjer å ha Lunsj-Ekspressen i Os sentrum, helst nær hamna, i sommar, og jobbar med å finna ein stad å stå.
– I tillegg skal matvogna litt på tur. Tysnesfest er avtalt, eg jobbar også med nokre andre festivalar, fortel Lukasz.