To nye hjartestartarar utandørs i Os sentrum

– Eit fint initiativ, seier ordførar, som kasta seg med i spleiselaget på strak arm.

Jostein Eck og Mikal Leigland blei samde om å spleisa. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyfredag 09. juli 2021 13:16

Catten Nightclub og Elvehuset har tatt initiativ til å kjøpa hjartestartarar - og å henga desse utandørs, tilgjengelege for alle.

– Vi har snakka om det ei stund, men i førre veke tok Bjarte Andersen det opp igjen, og eg tenkte det var på tide å handla, seier kollegaen Jostein Eck.

Bjarte og Jostein driv dei to utestadane. I utgangspunktet skulle dei spleisa på éin - det enda med å kjøpa to, og å henga dei utandørs.

– Vi har ope utover natta i helgene, likevel synest eg at desse skal vera tilgjengelege heile døgnet heile veka.

Det nærmaste vi kjem i sentrumskjerna, så vidt vi veit, er Os Taxi. Dei har sin innandørs, men drosjebua har døgnope.

Sa ja på strak arm

Å ta på seg ei investering på 40.000-50.000 kroner etter ein lengre periode prega av pandemi, kan virka tøft, sjølv for ei god sak.

– Det blei enklare då kommuneleiinga var rask og positiv. Ordførar Trine Lindborg er på ferie, men fungerande ordførar Mikal Leigland sa på strak arm ja til å betala boksane som gjer at hjartestartarane kan henga ute.

Montert i dag, mellom Elvehuset og T Moberg Sko. (Foto: Kjetil Vasby Bruarøy)

– Dette kostar så lite, og kan bety så mykje, at eg måtte berre seia ja. Om det i etterkant skulle visa seg at eg ikkje kunne løyva desse pengane, så betaler eg det sjølv, seier Leigland.

– Vi har hatt tilsvarande i Strandvik i fleire år, utanfor kontoret vårt og utanfor samfunnshuset. Det har heldivis ikkje blitt bruk for, men kan bety alt den dagen nokon får problem.

– Viktig at flest mogleg veit

I tillegg til velvilje frå rådhuset har Os Elektro sponsa straumframlegg og Os Røde Kors sagt at dei vil halda kurs for dei tilsette ved dei to utestadane.

– Vi skal få opplæring i både bruk av hjartestartar og annan førstehjelp, fortel Jostein.

Samtidig er han opptatt av at flest mogleg blir klar over at desse to hjartestartarane er på plass frå i dag.

– Dei skal naturlegvis registrerast på 113 sitt kart.

Dette kartet er framleis langt frå komplett, trass oppmoding seinast i 2019. Då var berre 22 av den gong minst 56 hjartestartarar i Os registrerte.

Talet har knapt vakse.

Fleire av hjartestartarane i Os, som Midtsiden oppsummerte i lister i 2016 og 2018, er ikkje registrerte.

Kva er det viktigaste du bør veta om hjartestartarar? Sjå denne 2 minutt lange videoen, laga av Røde Kors:

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.