Vaksinerer 12-15-åringar i neste veke

Denne veka har det vore vaksinasjon kvar dag. Rundt 4.000 dosar er sett. I neste veke er det sett av dosar og tid til dei som er frå 12 til 15 år gamle.

– I Bjørnafjorden startar vi opp vaksinasjon av denne gruppa allereie neste veke, opplyser kommuneleiinga.

Denne gruppa utgjer rundt 1.500 ungdomar i Bjørnafjorden kommune (1. januar i år var det 1.459 innbyggarar frå 11 til 14 år).

Vaksinasjonen er éin dose i første omgang. Gruppa får Pfizer-vaksinen, som er godkjent frå 12 år og oppover. Alle som får tilbod må vera fylt 12 år.

– Ungdom i alderen 12-15 år har generelt svært god effekt av vaksinasjon, opplyser FHI.

– Barn og unge blir heldigvis sjeldan alvorleg sjuke av koronaviruset. Men når fleire barn og unge blir smitta, vil nødvendigvis fleire av dei bli sjuke òg. FHI anbefaler difor vaksine til denne aldersgruppa for å beskytte dei mot alvorleg sjukdomsforløp, seier kommuneoverlege i Bjørnafjorden kommune, Klaus Melf.

Må ha med seg ein føresett

Mens 16- og 17-åringane fekk vaksine ute på dei tre vidaregåande skulane, må 12-15-åringane til Oshallen eller Eikelandsosen for å få vaksine.

Det vil bli utvida opningstid ved begge stasjonane neste veke, øyremerkt denne aldersgruppa.

Føresette til 12-15-åringar vil få tilsendt ein SMS med lenke til timebestilling for vaksinasjon.

– Det er ikkje drop-in, det må bestillast time.

Begge føresette må signera samtykke, ein av dei må vera med under vaksinasjonen.