SJ «Mathilde» til Os for å henta elevar frå Færder

Søndag kveld og utover måndag var SY «Mathilde» eit blikkfang i Os hamn.

– Vi ventar på elevar frå Steinerskolen i Vestfold, fortel skipper Anton Visby.

Skulen ligg på Nøtterøy i Færder kommune.

Normalt har skuta ein mannskap på 5-6, søndag var Anton del av ein mannskap på 7.

Mathilde har plass til 30 passasjerar.

– Første dag går vi gjennom reglar og praktisk informasjon, og så lærer dei seg å få opp hengekøyene. Dag to heisar vi segl.

73 fot lange Mathilde har eitt storsegl, tre stagsegl, to råsegl, to «snipper» og eit toppsegl - alt i naturfiber.

Bygd i Kvinnherad på 1800-talet

SJ Mathilde er driven av Hardanger fartøyvernsenter, og seglasa går ofte i Hardangerfjorden, men også rundt Bømlo og i Bjørnafjorden.

Mathilde blei bygd av Ole H. Nerhus i Kvinnherad og sjøsett i 1884. Jakta blei brukt i «nordlandsfarten» der ferdakarar kjøpte opp skrei i Lofoten og i Finnmark, for så å salta og tørka den før fisken blei selt i Bergen og Kristiansund.

Bildeserie:

1 av 2

Den har seinare hatt ulike eigarar langs Norskekysten, både i nord og i Jondal og Mosterhamn, eigar på sistnemnde stad døypte skuta om til «Kari Louise».

Siste eigar før Mathilde kom til Hardanger igjen var Per Angell frå Herøy, som dreiv frå 1977 til 1982.

I åra 1984-89 blei Mathilde sett i stand og tilbakeført som seglfartøy, og var på mange måtar utgangspunktet då Hardanger fartøyvernsenter vart etablert.

Sidan 1990 har ho gått i eit fast driftsopplegg som omfattar museumstokt, leirskule og medseglartokt.

Kjelde/les meir på fartoyvern.no og norsk-fartoyvern.no