Vakna til at bilen sto i full fyr
Onsdag klokka 07.02 kom det melding om bilbrann i Nordstrøno.
Politi og brannvesen rykte ut, politiet var først på staden.
– Vedkomande som bur i huset hadde kome seg ut. Han sto med hageslange og dempa brannen, men det var framleis opne flammar då vi kom fram, fortel politioverbetjent Atle Birkeland.
Bildeserie:
Politiet hjelpte til med ein ekstra slange og med pulverapparat frå eigne bilar. Så kom brannvesenet og fekk sløkt bilen grundig.
– Den tidlege innsatsen var viktig, for det var fare for spreiing, seier Gitle Smaadal frå Bjørnafjorden brann og redning.
Bilen sto parkert tett inntil inngangsdøra på huset. Hus- og bileigar fortel at han har soverom nær inngangsdøra, og at han først høyrde nokre lydar utanfor. Som om nokon gjekk i singelen.
– Så kjente eg røyklukt, og då eg kom ned såg eg at bilen sto i full fyr, fortel han til Midtsiden.
Han kom seg raskt ut og fekk byrja å dynka bilen med vatn.
Årsaka til brannen er foreløpig ukjent.