Næringsliv | 12. feb. 2022

«Garderobe-ekspressen» på nytt oppdrag

Skapte skreddarsøm på Nore Neset.

«Garderobe-ekspressen» på nytt oppdrag
Ole, Arnt og Johnny i sving med siste del av første garderobe. «Trommekassen» i midten fungerer også som hylle og bord. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 12. feb. 2022 08:18

Dei har bygd benkar, gapahukar og sankthansbål før. Og rusta opp idrettsgarderobar hos Lysekloster il og Os Fotball.

Nyleg har dei farga Nore Neset sitt klubbhus blått - på innsida, rett nok.

– Vi ventar i grunnen berre på ein telefon frå Aarvik no, om at vi må gå og kjøpa inn noko raudfarge, seier Tor-Arne Hitland og ler.

Etter oppdrag for tre idrettslag er det framleis fleire igjen, som dei raudkledde Søre Neset med Bjarte Aarvik som leiar.

Hitland sjølv leiar arbeidslaget frå prosjektet «Livskvalitet», og dei har i fleire år hatt varierte oppdrag. Men oppgradering av garderobar har nærmast blitt ein spesialitet.

– Det blei også gjort litt ekstra ut av denne, med trommekasse på midten og eigenprodusert strategitavle med magnet på veggen.

– Trommekasse?

– Dei vinn jo så mykje her på Nore Neset, så dei må ha noko å tromma på når dei skal feira. Då er det betre at dei slår på eit robust bord midt i garderoben, enn at dei hamrar laus på veggane, forklarer Ole.

Han har i fleire år vore blant dei ivrigaste deltakarane i arbeidslaget - og på aktivitetane. No har han kome seg ovanpå, og er ein av dei tilsette som er med og leiar prosjektet.

Eit tidleg behov

Martin Røttingen Eidsvik, utviklingsansvarleg for fotballen i idrettslaget, fortel kvifor det allereie blei bestilt oppussing av garderobane i det nye klubbhuset.

– Bygget og garderobane er jo ganske nye, men dei er mykje brukte av unge og eldre aktive menneske. Veggane var sterile. Med lys farge blei alt av småmerke veldig synlege.

– Garderobane trengte oppussing, og vi ville samtidig gi dei litt identitet. Med våre eigen farge og våre eigne slagord kan det henda at spelarane også tar endå betre vare på fasilitetane, seier Martin.

Eidvik (t.v.) er spesielt glad for strategitavla som Hitland sitt arbeidslag har laga til han. (Foto: Kjetil Vasby Bruarøy)
Eidvik (t.v.) er spesielt glad for strategitavla som Hitland sitt arbeidslag har laga til han. (Foto: Kjetil Vasby Bruarøy)

Han visste også kven han skulle ringa.

– Eg var jo i Lysekloster då dei pussa opp der, og på Os då dei gav garderobane på Kuventræ eit løft, seier den erfarne fotballspelaren og -trenaren.

– Eg visste kor flinke og kjekke dei er, så då var det berre til å kontakta Tor-Arne og Ole.

Bortegarderoben skal også malast. Her før start. (Foto: Kjetil Vasby Bruarøy)
Bortegarderoben skal også malast. Her før start. (Foto: Kjetil Vasby Bruarøy)

Høgt aktivitetsnivå

Hitland fortel om god og aukande aktivitet i Livskvalitet-gruppa.

– Gatelaget held seg i fotballtrening, vi skal til å starta med klatring og golf, og vi har fleire oppdrag som ventar oss utover våren - i tillegg til faste oppgåver for Oseana.

– Men dette oppdraget her passa ekstra godt! Vi har vore litt reduserte no under pandemien, med restriksjonar som har hindra oss frå både jobb og transport. Å sitja saman i bil har ikkje alltid vore greit dei siste to åra.

– No er vi heldigvis på veg ut av restriksjonane, så får vi håpa vi også held oss friske utover vinter og vår, så vi får trent og jobba så mykje som vi har planlagt.

Blant oppdraga som ventar er bygging av benkar rundt bålpanne ved Drangebu.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.